مراتى بتكلم حمادة

المساهمات : 2711 تاريخ التسجيل : 19/08/2007

مراتى بتكلم حمادة

تحب نتعرف ؟
لأ بلاش .

إيه إعترافك ؟
أنا متزوج من 11 سنة عن قصة حب كبيرة .

وعندك كام سنة دلوقتى ؟
حوالى 35 سنة وبعدين كنا عايشين كويسين جداً ، ما أعرفش إيه اللى حصل المهم إنى لقيت نفسى فى يوم من الأيام باشك فى مراتى وفى يوم لقيت رقم على التليفون ما عرفتش الرقم ده بتاع مين .

وإنت بتعمل ريدايل ؟! ( إعادة طلب الرقم ) يرد عليك صوت إنت ما تعرفهوش ؟!
أنا لقيت الرقم ده عندى فى الريدايل وعايز أطمئن يمكن يكون حد بيعاكس عندى وده تليفون محل وكده قاللى أنا ما عنديش فكرة عن حاجة زى كده قلت ماشى ومتشكر بعدين شلت التليفون زى ما هو كده يومين ثلاثة فى الدولاب وقفلت عليه بقت زعلانة ومضايقة المهم إنه صعبت عليه وطلعته وبعديها بمدة لقيت ناس بتتكلم فى التليفون بيعاكسوها يعنى وفى مرة أخذت السماعة وهزأت الراجل ده اللى بيعاكسها دى متزوجة وكده فقاللى دى بتكلم واحد قلت له إنت مالك مالكش دعوة قال لى والله العظيم بتكلم واحد .
المهم قعدت أزعق له وما إديتوش فرصة إنه يتكلم وقفلت السكة على كده وبعدين جيت فى يوم أنا وهى والأولاد راجعين من عند ماما لقيت تليفون جه وما حدش رد بعدها بشوية لقيت تليفون تانى ردت علي واحدة قالت لى المدام موجودة قلت لها دقيقة واحدة وأنا عشان الفار بيلعب جواي رحت رافع السماعة الثانية فلقيت واحدة بتتكلم كلام عادى خالص بس برده ما قفلتش السكة وأخر المكالمة لقيتها بتقولها خدى كلمى حمادة ولقيتها قالت له حبيبى مش ممكن تتخيلى حالتى كانت إزاى متهيألى صوت قلبى كانوا هما سامعينه قالت الكلمتين دول وراحت قافلة السكة بس وهى معدية من أوضة النوم لقت السماعة فى إيدى فدخلت على جوه قالت لى فيه إيه أنا غصب عنى رحت ضاربها بالقلم كنت فى حالة تانية خالص كان ممكن أموتها لكن لما لقيت الولاد صرخوا تراجعت وطلبت أهلها فجاءوا ولا عملوا حاجة طب بس إهدى طب بس إستنى ما تقولش الكلام ده الكلام ده عيب الكلام ده ما يصحش وما حدش صدقنى وقالوا علي عبيط ومجنون قلت لهم خدوا بنتكم وإنزلوا خدوها وقعدنا على كده شهرين ورجعت بعد كده طلبتنى وقالت لى عايزة أقعد معاك راحت قالت والله ما فى حاجة وإنت حبى الأول والأخير وأنت وأنت .. ما قالتش أى حاجة تفيد إنها مُدانة قلت لها يا بنتى على كل حال علشان خاطر الأولاد والأولاد كانوا معايا فى الشهرين دول قلت لها إنت ها ترجعى البيت وإنت منك لربنا ورجعت البيت ورحنا العمرة ورجعنا قلت لها إنت دلوقت منك لربنا بس أنا الصراحة كان لسه الشك جواية أقول لها إيه اللى حصل تقول والله ما فيش حاجة أقول لها فى حاجة تقول لأ ، ودارت الأيام وأنا مرة بطلب البيت لقيته مشغول ما أعرفش إيه اللى خلانى أعمل كده طلبت الرقم الثانى لقيته مشغول .

وإنت جبت الرقم الثانى منين ؟
طلع معاها فى الشغل لأنه وحيد على إخواته البنات ومدلع شوية المهم رحت عامل تليفون وموصله عندى فى السطح وخليت تليفون واحد تحت وفى يوم قلت لها أنا نازل وفعلاً بعد شوية لقيتها بتتكلم قالت له أخبارك إيه وكده وهو يقول لها هاأجيبلك هدايا عايز أشوفك وكده
وهى تقول له إنت مجنون ده غلط خلينا ماشيين كده كويس
حسيت إنها إنسانة ما تنفعش فطلبت بابا وقلت له الموضوع قال لى بكره تعمل نفسك إنك نازل ولو الواد ده جالها الشقة إقفل عليهم الباب وبلغ قلت له يا بابا أنا ما أقدرش ذنب الولاد إيه لما أمهم تنزل بالبهدلة دى فقال لى طيب على كل حال إتصرف طبيعى وطلعت فوق أستنى التليفون لحد ما إتكلموا كلام مش ممكن يتوصف مش ممكن زوجة تعمل كدة قفلت السكة ونزلت وفتحت الباب ودخلت لقيتها وشها شاحب رحت ضاربها بالقلم كانت متصورة إنى هأموتها قلت لها خدى بعضك وإطلعى برة قعدت تبكى وتلطم وتقول أنا باين على مريضة مش عارفة ليه أنا بعمل كدهوعلشان ما تقوليش عليه حرامى زى زمان خدى يا بنتى حاجتك وإنتى نازلة وأخدت كل حاجة وبعد شهر والتانى لاقيتهم رافعين قضايا على فى المحاكم ويا ع البهدلة اللى شفتها فى المحاكم إستغلتنى إستغلال ما فيش كده والمحاكم إتضح إن المحاكم دى مش عايز أقول ما فيش عدل لكن ياما فى السجن مظاليم إتعاملت بإسم أبويا على إنى راجل مليونير وأخذت منى اللى ما كانتش تحلم بيه.

والولاد مع مين ؟
معاها طبعاً وكل ما أقولهم يا جماعة ده شئ كتير يقولوا لأ ده أنت كفاية إسم أبوك ولما راحت عشان مبلغ النفقة وهومبلغ كبير جداً طلبت أنهم يقسطوا المبلغ .. تقوم التحريات تقول ده قادر يدفع هذا المبلغ مضاعف قلت للضابط انت بتعمل ليه كده أنا راجل موظف أنت بتعاملني بأبويا سيبك أنا ابن مين مفيش فايدة حكمت المحكمة علي ظلما وعدوانا ولا زلت بادفع الثمن إلى الآن تعبت جدا ولم أجد حد جنبي

النفقة قد أيه ؟!
600 جنيه

اتحكم لها بالطلاق ؟
لأ لسة

أما ل النفقة على أيه ؟
النفقة من حق الزوجة حتى ولو كانت في حضن زوجها ، القانون بيقول كده حتى لو الزوجة معاه في البيت وحضانة الأولاد وإن الزوجة لو عندها بنت تقدر تاخد البنت لحد يوم ما تتزوج
صدقيني أنا شايف انه الحل ان الواحد ياخد حقه بدراعه هل هو ده شرع ربنا ؟
وتخيلي بعد اللي عملته ده كله لكن عمري في حياتي ما حبيت واحدة غيرها شوفي قد إيه .. رغم حزني الشديد منها تفتكري أعمل إيه

انت مش معاك محامي ؟
للأسف المحامي بتاعي بيقول لي مش مهم مش مشكلة الحمد لله مادام في مقدرتك، بس يا أخي دي مش مقدرتي يقول لي يا سيدي احمد ربنا ان ابوك موجود طب ده العدل بتاع ربنا يقول لي روح كلمهم في التحريات لإن قضيتك مع التحريات روح كلم الضابط قول له التحريات دي حرام عليك

طب ما تكلم الضابط ؟
رحت للضابط قال لي أنا ما اقدرش أقول كده عشان انتم اسمكم بيسمع في البلد انكم مبسوطين ، يا سيدي أنا راجل موظف .. فكرت اني اروح لمدير الأمن واعمل شكوى قالوا لي مش هيعمل حاجة

جرب كل السبل عشان حقك ؟
تعبت مش عارف حاسس ان أنا باموت في مكاني وانا اقعد مكاني وأنا كل يوم أروح لدكتور شكل كل يوم أعمل جميع التحاليل دم وأشعة وجميع رسومات القلب .. وزمايلي يقولوا لي انت مافيكش حاجة لا تتمارضوا فتمرضوا فتموتوا ، انما انا مش قادر انام كل شوية حاسس اني هاموت .

وانت ما قلتش أمام المحكمة التليفونات اللي سمعتها ؟
ما قلتش لسببين .. أولا فضيحة وكده

ثانيا ان انت ما عندكش الدليل ؟
لا أنا عندي شريط .. هما راحوا وسألوا محاميين .. شوفي قلة الأدب لما أهلها يعرفوا ان بنتهم بالمنظر ده وبدل ما يطلقوها بالحسنى وشكرا يا بني على انك سترت البنت كل واحد يروح لحاله لأ راحوا سألوا وقالوا ده معاه شريط قالوا لهم لا ما يقدرش يعمل به حاجة

بالعكس انت ممكن تنحبس عشان سجلت ؟
المحامي قالي ممكن ترفع عليك دعوة رد شرف شفتي اللي ما عندهاش شرف ترفع علي دعوة رد شرف وانا مش عارف دي راحت للضابط في القسم وقالت له اللي انا مش قادر أقوله عليها قالت له علي ده بتاع ستات وبنات وبيضيع فلوسه في السهرات واحنا مستخسر فينا والضابط صدق الكلام ، أنا عايز أفهم احنا ليه في مصر دايما مع الستات سواء غلطانة ولا مش غلطانه مش كده في رجاله بياخدوا حقوقهم واكثر بطرق ملتوية ... فين الطريق الملتوي هي لو ما كانتش اخدت حاجتها ما كنتش اقدر أعمل حاجة لما لقت حاجتها معاها قالت ما خدتش منه حاجة وطلبتهم مني تاني وقالت ده واخد كل حاجاتي ولبست فضة عشان تقول ده أخد الدهب

أكيد دي نصايح المحامي بتاعها ؟
نصايح المحامي ونصايح مامتها ونصايح الناس السو اللي شغلتهم المشاكل ... واضح ان الواحد قبل ما يتخذ قرار لازم يفكر ويسأل كويس ؟

كان المفروض قبل ما تمشيها تسأل محامي أيه اللي تعمله بالضبط ما حدش بيتعلم ببلاش